సల్మాన్ ఖాన్ ‘మాతృభూమి’ విడుదలలో అనిశ్చితి, 2027కి వాయిదా పడే అవకాశం?

ఎప్పుడూ వార్తల్లో నిలిచే సల్మాన్ ఖాన్, తన ప్రతిష్టాత్మక యుద్ధ చిత్రం 'మాతృభూమి: మే వార్ రెస్ట్ ఇన్ పీస్' (Maatrubhumi: May War Rest in Peace) తో అభిమానులలో భారీ అంచనాలను పెంచారు. అయితే, తాజా సమాచారం ప్రకారం, ఈ చిత్ర విడుదల పెద్ద చిక్కుల్లో పడింది. ముఖ్యంగా భారత్-చైనా సంబంధాలు మెరుగుపడుతున్న తరుణంలో, ప్రభుత్వ స్థాయిలో వ్యక్తమైన కొన్ని అభ్యంతరాల వల్ల ఈ ప్రాజెక్ట్ ప్రస్తుతం సందిగ్ధంలో పడినట్లు తెలుస్తోంది.

అపూర్వ లఖియా దర్శకత్వం వహించిన ఈ చిత్రం 2027 వరకు థియేటర్లలోకి రాకపోవచ్చని పరిశ్రమ వర్గాల టాక్. కంటెంట్ పరంగా ఉన్న సమస్యలు పరిష్కారమైనప్పటికీ, రాబోయే ఏడాది లేదా రెండేళ్లలో పెద్ద సినిమాల విడుదలలతో క్యాలెండర్ ఇప్పటికే నిండిపోయిందని, అందుకే 'మాతృభూమి'కి సరైన స్లాట్ దొరకడం కష్టమని అంతర్గత వర్గాలు చెబుతున్నాయి. దసరా పండుగను విడుదల కోసం అనువైన సమయంగా భావించినప్పటికీ, ఈ పండుగ సీజన్ కు సినిమా వస్తుందో లేదో అన్న దానిపై స్పష్టమైన క్లారిటీ లేదు.

ఈ సినిమాలో సల్మాన్ ఖాన్ సరసన చిత్రాంగద సింగ్ ఒక కీలక పాత్రలో నటిస్తుండగా, సల్మాన్ ఖాన్ వీరమరణం పొందిన కల్నల్ సంతోష్ బాబు పాత్రను పోషిస్తున్నారు. సల్మాన్ ను సరికొత్త అవతారంలో చూడాలనుకుంటున్న అభిమానులకు ఎదురుచూపులు మరింత తప్పేలా లేవు. మరి చిత్ర నిర్మాతలు ఈ సవాళ్లను ఎలా అధిగమిస్తారో వేచి చూడాలి.