ఎన్నికల తర్వాత ప్రశాంత వాతావరణంలో తిరుచెందూర్ మురుగన్ ఆలయాన్ని సందర్శించిన విజయ్

ఎన్నికల తర్వాత విజయ్ ఆలయ సందర్శన.. భారీగా తరలివచ్చిన అభిమానులు

ప్రముఖ నటుడు, టీవీకే అధినేత విజయ్, తమిళనాడు అసెంబ్లీ ఎన్నికలు ముగిసిన వెంటనే తిరుచెందూర్ మురుగన్ ఆలయాన్ని సందర్శించి వార్తల్లో నిలిచారు. అటు వెండితెరపై, ఇటు రాజకీయాల్లోనూ తనదైన ముద్ర వేసిన విజయ్, చెన్నై నుంచి మదురైకి ప్రైవేట్ విమానంలో వెళ్లారు. తన ప్రయాణ ప్రణాళికలను ఆయన చాలా గోప్యంగా ఉంచారు.

ప్రయాణం రహస్యంగా సాగినప్పటికీ, మదురై విమానాశ్రయానికి విజయ్ చేరుకున్నారనే వార్త దావానలంలా వ్యాపించింది. దీంతో తమ అభిమాన స్టార్‌ను చూసేందుకు పెద్ద ఎత్తున జనం తరలివచ్చారు. సాధారణంగా వైట్ షర్ట్, ప్యాంట్లలో కనిపించే విజయ్, ఈసారి సంప్రదాయబద్ధంగా పట్టు వేష్టి, చొక్కా ధరించి కనిపించారు. తన కారు సన్‌రూఫ్ ద్వారా అభిమానులకు అభివాదం చేస్తూ ముందుకు సాగారు. విమానాశ్రయం నుంచి ఆయన కాన్వాయ్ బయటకు రావడానికి ఆలస్యం కావడంతో, ఉత్సాహంగా ఉన్న గుంపును నియంత్రించడానికి పోలీసులు రంగ ప్రవేశం చేయాల్సి వచ్చింది.

అనంతరం విజయ్ రోడ్డు మార్గంలో తిరుచెందూర్ చేరుకుని, తెల్లవారుజామున జరిగిన ప్రత్యేక 'విశ్వరూప దర్శనం' పూజలో పాల్గొన్నారు. ఆలయ అధికారులు ఆయనకు పవిత్రమైన ‘వేల్’ (ఈటె)ను అందించి గౌరవించారు. ఆలయంలో విజయ్ ప్రవర్తనను అక్కడి భక్తులు ప్రశంసించారు. ఎటువంటి ప్రత్యేక సౌకర్యాలు కోరకుండా, సామాన్యుడిలా తన వంతు కోసం ఓపికగా వేచి ఉండటం అందరినీ ఆకట్టుకుంది.

ఎన్నికల ఫలితాల కోసం అంతా ఎదురుచూస్తున్న వేళ, అటు రాజకీయ నేతగా, ఇటు సూపర్ స్టార్‌గా విజయ్ తదుపరి అడుగులు ఎలా ఉండబోతున్నాయనేది ఇప్పుడు ఆసక్తికరంగా మారింది.